Германия канцлери Олаф Шольц Украина президенти Донбассга алоҳида мақом беришга тайёрлигини айтган.
Шольцнинг сўзларига кўра, Зеленский шарқий ҳудудларга алоҳида мақом, конституция ислоҳоти ва сайлов ҳуқуқи ислоҳотига тайёрлигини билдирган. Сиёсатчи ушбу лойиҳалар Донбасс бўйича мулоқот гуруҳига киритилишини айтган.
Донецк ва Луганск вилоятларига алоҳида мақом тақдим этиш Минск келишувларининг асосий шарти ҳисобланади. айнан шу пункт Киевнинг кескин норозилигига сабаб бўли келади. Айрим сиёсатчиларнинг фикрича, бу Украина ҳудудий яхлитлигига путур етказиши мумкин.
Маълумот ўрнида: Сўнгги вақтларда Ғарб Россияни Украинага бостириб кириш ниятида эканини айтиб келмоқда. Ўз навбатида Москва буни инкор қиляпти. Охирги кунларда 20 дан ортиқ давлат ўз фуқароларининг Украинага боришини тақиқлади. Буюк Британия ва АҚШ эса элчихонасини Киевдан украина ғарбидаги Львовга кўчирмоқда.
Эслатиб ўтамиз, аввалроқ Ўзбекистоннинг Украинадаги элчихонаси ватандошларни ваҳимага тушмасликка чақирганди.
Жаҳонгир Қўзиев