Унга кўра, 2022–2024 йилларда Ўзбекистон Республикаси телекоммуникация инфратузилмасини ривожлантиришнинг мақсадли кўрсаткичлари ҳамда халқаро ва давлат аҳамиятига молик автомобиль йўлларини мобил алоқа қамрови билан таъминлаш режа-жадвали тасдиқланди.
Шунга келиб чиқиб, 2022 йил 1 январдан бошлаб, Интернетга кенг полосали уланиш тармоқларини лойиҳалаш ва қуришда маъмурий бинолар ва кўп квартирали уйларни камида 1 Гбит/с ўтказувчанлик қобилияти билан таъминлаш назарда тутилади. Таълим ташкилотлари, соғлиқни сақлаш муассасалари ва бошқа давлат ташкилотларини ҳам камида 100 Мбит/с ўтказувчанлик қобилияти билан жиҳозлаш тизими ишлаб чиқилмоқда.
2021 йил якунигача эса, барча ички ишлар органлари таянч пунктлари, маҳалла фуқаролар йиғинлари, жазони ижро этиш муассасалари, ички ишлар органлари профилактика инспекторлари хоналари, халқ таълими муассасалари, давлат архивлари ва ташкилотлари Интернет билан таъминланади.
Шунингдек, 2023 йилгача яна бир қатор иш режалари амалга оширилиши белгиланди. Жумладан:
халқаро маълумотлар узатиш каналининг ўтказувчанлик қобилияти 3,5 маротаба оширилади;
150 минг км оптик толали алоқа линиялари қурилиш ҳисобига маълумотлар узатиш тармоғи кенгайтирилади;
оптик толали алоқа линиялари барча аҳоли пунктларига етказилиб, уй хўжаликларининг камида 80 фоизи Интернетга кенг полосали симли уланиш имконияти билан таъминланади.
Шунингдек, мавжуд чегара ўтиш нуқталари орқали “Ўзбекистон–Афғонистон–Покистон”, “Ўзбекистон–Қирғизистон–Хитой” ва “Ўзбекистон–Туркманистон–Озарбайжон–Туркия” йўналишларида халқаро магистрал каналлар ташкил этилади. Бундан ташқари, Хитой Халқ Республикасида янги уланиш ва ўзаро Интернет трафиги алмашинуви нуқталарини ташкил этиш чоралари кўрилади.
Аввалроқ келгуси беш йилда пойтахтда Интернет тезлигини 5 баробарга, рақамли хизматлар ҳажмини 3 баробарга ошириш режалаштирилганини ҳақида хабар берилганди.
Оламгир Абдиев