Shavkat Mirziyoyev kelgusi besh yilda poytaxtda Internet tezligini 5 barobarga, raqamli xizmatlar hajmini 3 barobarga oshirish rejalashtirilganini qayd etdi.
Shuningdek,
— shaharda quriladigan har bir ko‘p qavatli uy-joy, taʼlim, tibbiyot, madaniyat va boshqa obyektlar yuqori tezlikdagi Internet tarmog‘i bilan jihozlanishi shart bo‘ladi;
— mavjud 2 mingta tibbiyot tashkilotlari, bog‘cha, maktab, oliygoh va mahalla idoralari yuqori tezlikdagi Internet tarmog‘iga ulanadi;
— barcha metro stansiyalari, avtobus bekatlari va boshqa jamoat joylari simsiz Internet tarmog‘i bilan taʼminlanadi;
— davlat xizmatlari va pensiya tizimi to‘liq raqamlashtiriladi;
— shahar aholisi uchun yagona tibbiy karta, tibbiy sug‘urta va elektron retsept axborot tizimlari ishga tushiriladi.
— barcha tumanlarda “Xavfsiz shahar” tizimi joriy etiladi.
Bunda sunʼiy intellekt qurilmalaridan keng foydalangan holda aholi gavjum joylar, dam olish maskanlari, vokzal va aeroportlar hamda chorrahalarda shaxsni identifikatsiya qilish imkoniyati yaratiladi.
— Mirzo Ulug‘bek tumanida “IT-Park” foydalanishga topshirilib, raqamli mahsulotlar hajmi 100 million dollarga yetkaziladi.
Shuningdek, Shavkat Mirziyoyev Toshkentdagi 575 ta mahallaga 10 milliard so‘mdan mablag‘ ajratilishi haqida ham to‘xtalib o‘tdi:
— Mahallalarni rivojlantirish bo‘yicha shahar hokimligi qoshida alohida jamg‘arma tashkil etiladi hamda har bir mahallaga 10 milliard so‘mdan ajratiladi. Bu shahar bo‘yicha qariyb 600 million dollar mablag‘ deganidir.
Ushbu mablag‘larning 5 milliard so‘mi aholi takliflari asosida ochiq va shaffof “Fuqarolar byudjeti” tizimidan foydalanib, eng dolzarb bo‘lgan ijtimoiy va kommunal loyihalarga sarflanadi.
Yana 5 milliard so‘mi esa mahallada bandlikni taʼminlash, kichik va oilaviy tadbirkorlikni qo‘llab-quvvatlashga yo‘naltiriladi. Mazkur mablag‘dan samarali foydalanishga yangi ish boshlaydigan hokim yordamchilari masʼul bo‘ladi.
Avvalroq Shavkat Mirziyoyev Chirchiq shahridagi “Kimyogarlar” madaniyat saroyi hamda Toshkent viloyatida joylashgan IT akademiyasiga borgani xabar qilingandi.