Модрич ва Кроос «Реал»дан норози

 

«Реал» ярим ҳимоячилари Лука Модрич ва Тони Кроос Мадрид клубини тарк этиши мумкин.

 

«Релево» нашри хабарига кўра, Модрич ва Крооснинг ўйин вақти ўтган мавсумга нисбатан деярли ярмига қисқарган ва иккала футболчи ҳам бу ҳолатдан норози. Ўйинчилар жамоада етакчи ролларни сақлаб қолишни хоҳлашади. Қайд этилишича, Крооснинг шахсан ўзи ротация футболчиси бўлиш учун эмас, фаолиятини якунлаш ҳақидаги фикрини ўзгартирган.

 

Лука Модрич 2012 йилдан бери Мадрид клубида ўйнаб келмоқда. Ўтган мавсумда хорватиялик ярим ҳимоячи «Реал» сафида барча турнирлар доирасида 51 та ўйин ўтказиб, 6 та гол урди ва 6 та голли узатмани амалга оширди. Хорватияликнинг «Реал» билан шартномаси кейинги мавсум охиригача амал қилади. Трансфермаркт интернет порталига кўра футболчининг тахминий нархи 10 миллион еврони ташкил қилади.

 

Крооснинг эса «Реал» билан шартномаси 2024 йилгача мўлжалланган. Ўтган мавсумда Кроос барча турнирлар доирасида 52 та ўйинда қатнашиб, 2 та гол урди ва 6 та голли узатмага муаллифлик қилган. Ярим ҳимоячи «Реал Мадрид» билан биргаликда тўрт марта Чемпионлар лигасида, беш марта клублар ўртасидаги жаҳон чемпионатида ва уч марта Испания чемпионатида ғолиб чиққан.