1 гектар ер майдонини расмийлаштириб бериш эвазига 15 минг АҚШ доллари талаб қилган.
Наманган вилоятидаги туманлардан бирининг давлат солиқ инспекцияси бошлиғи жиноятга қўл урди. У ўзининг ҳайдовчиси номида бўлган сабзавотчиликка ихтисослашган фермер хўжаликнинг 1 гектар ер майдонини бошқа бир фуқаро номига расмийлаштириб бериш эвазига 15 минг АҚШ доллари талаб қилган. Бу ҳақда ДХХ хабар берди.
Хабарда айтилишича, Давлат хавфсизлик хизматининг Наманган вилояти бўйича бошқармаси, вилоят прокуратураси ва иқтисодий жиноятларга қарши курашиш Департаментининг ҳудудий бошқармаси ходимлари томонидан ўтказилган тезкор тадбирда, у сўралган пулни хизмат хонасида олган вақтида ашёвий далиллар билан ушланган. Ҳозирда тергов жараёнлари кетмоқда.
Аввалроқ, Тошкентда фуқарога 1 гектар ерни 200 минг доллар эвазига олиб беришни ваъда қилган шахслар ушлангани ҳамда Тошкент вилоятида 263,3 гектар ер майдони ўзбошимчалик билан эгаллангани ҳақида хабар берилганди.
Муножат Валиева