Қайд этилишича, Бош прокуратура ҳузуридаги департамент ҳамда ДХХнинг Юнусобод тумани бўлимлари томонидан тезкор тадбир ўтказилган. Тадбир давомида С.У. ва Б.А. исмли шахслар фуқаро Д.га 200 минг доллар эвазига Тошкент вилояти ўрмон хўжалиги тасарруфидаги 1 гектар ер майдонини ваколатли танишлари орқали унинг номига расмийлаштириб олиб беришни ваъда қилгани аниқланган.
Ушбу шахслар олдиндан келишилган пулнинг 10 фоизини ҳисоблаб, 20 минг долларни олган вақтида ашёвий далиллар билан ушланган.
Таъкидланишича, мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Бўстонлиқ туманида 5 гектар ерни 150 минг АҚШ долларга олиб беришни ваъда қилган, Бухорода 10 минг доллар эвазига уй-жой қуриш учун ер олиб бермоқчи бўлган шахс ушлангани ҳамда ҳокимлик заxирасидаги ерни 8 000 долларга сотмоқчи бўлган фуқаро қўлга олинганди. Шунингдек, ДХХ томонидан ноқонуний ер сотиш ҳолатларининг олди олингани ҳақида хабар берилганди.