Наманганда 48 ёшли аёлнинг велосипеди ўғирлаб кетилди
Наманган вилояти Чортоқ туманида 48 ёшли аёлнинг велосипедини ўғирлаган шахсга жиноят иши қўзғатилди. Бу ҳақда вилоят ИИБ матбуот хизмати хабар берди.
9 июль куни аёл ИИБга мурожаат қилиб, шу кунга ўтар кечаси номаълум шахс уйига девор ошиш йўли билан кириб, 1,4 миллион сўмлик велосипедини ўғирлаб кетганини маълум қилиб, чора кўришни сўраган.
Чортоқ туман ИИБ ЖҚБ катта тезкор вакили ва тезкор вакиллар томонидан олиб борилган тезкор-қидирув ва суриштирув ҳаракатлари натижасида ушбу жиноятни шу туманда яшовчи, 2020 йилда Жиноят кодексининг 226-моддаси (маъмурий назорат қоидаларини бузиш) 1-қисми билан судланган, 1979 йилда туғилган фуқаро содир этгани аниқланган.
Ҳолат бўйича Чортоқ туман ИИБ ҳузуридаги ТБ томонидан 9 июль куни Жиноят кодексининг 169-моддаси (ўғрилик) 2-қисми билан жиноят иши қўзғатилган.
