НАТО бош котиби Йенс Столтенберг альянс давлатларини Украинани узоқ муддатга қўллаб-қувватлашга чақирди. Бу ҳақда у Испаниянинг La Vanguardia нашрига берган интервьюсида айтган.
“НАТОнинг биринчи навбатдаги вазифаси — Украинага ёрдам бериш. Урушда ҳеч нарсани олдиндан айтиб бўлмайди. Ҳеч ким қачон бу нарса тугашини айта олмайди, аммо биз ўз ёрдамимизни узоқ истиқболда ҳам беришга тайёр туришимиз керак”, – деган бош котиб.
Столтенбергнинг қўшимча қилишича, Шимолий Атлантика иттифоқининг яна бир вазифаси – эскалацияга йўл қўймаслик.
“Агар бу НАТО ва Россия урушига айланиб кетса, у бутун Европага янада даҳшатли зарар келтиради. Шу сабабли биз эскалацияга йўл қўймаслигимиз зарур. биз аниқ айтяпмиз – НАТО Украинани қўллаб қувватлайди, аммо уруш иштирокчиси эмас”, – деб қайд этган у.
Аввалроқ Германия канцлери Украина уруш оқибатларини юз йилгача сезишини айтганди.