НАТОнинг йирик денгиз машғулотлари бошланди
Унда 14 сувости ва сувусти кемалари жалб қилинган.
Атлантика океани шимолида НАТОнинг сувости кемаларига қарши йирик машғулотлари бошланди. Бу ҳақда альянс расман маълум қилди.
Машғулотлар Dynamic Mongoose деб аталади. Ўтган ҳафтада унда иштирок этиш учун Исландиянинг Рейкьявик портига НАТОнинг тўққиз давлатлари сувости ва сувусти ҳарбий кемалари келган.
Ўқув машқлари GIUK деб аталадиган чизиқда — НАТОнинг Шимолий Атлантикадаги сувости кемаларига қарши мудофаа чизиғида ўтказилади. У Гренландия, Исландия ва Буюк Британия ўртасида жойлашган. Бу ерга альянснинг SOSUS сувости кемаларига қарши гидроакустик овозли кузатув тизими жойлаштирилган.
Машғулотларда АҚШ, Буюк Британия, Германия, Франция, Канада, Норвегия, Дания, Нидерландия ва Португалиядан учта сувости кемаси, 11 ҳарбий кема ва 16 патруль самолётлари иштирок этади.
Аввалроқ НАТО кемалари Болтиқ денгизига киргани тўғрисида хабар берилганди.
