Нефть, газ, Украина

 

Владимир Путин Теҳронга ташрифи давомида ОАВ билан суҳбат ҳам ўтказди. Унда Украина, нефть ва газ экспорти ва Сурия масалалари ҳақида гап боради.

 

“Остона формати” учлиги учрашуви якунлари ҳақида

 

Путин Туркия ва Эрон президентлари билан ўтган уч томонлама учрашув якунлари ҳақида гапирар экан, томонларнинг Сурия ҳудудий яхлитлигини сақлаш ва терроризмдан ҳоли ҳудудга айлантириш тарафдори эканини маълум қилган. Шу билан бирга учликнинг Фрот бўйидаги айрим масалаларда фикри бўлак эканлиги, аммо АҚШ қўшинларининг Сурия ҳудудини тарк этиши зарурлиги таъкидланган.

 

Украина билан музокаралар

 

“Ҳар қандай музокаралар якуни томонларнинг эришилган келишувларни бажариш истагига боғлиқ. Аммо биз Киевда бундай истак йўқлигини кўряпмиз”, – деган РФ етакчиси.

 

Путин март охирида Истанбулда амалда келишувга эришилганини, фақатгина уни пунктларга бўлиб чиқиш қолганини очиқлади. Аммо унинг сўзларига кўра, Россия қўшинлари Марказий Украинадан олиб чиқилгач, расмий Киев шартларни бажаришдан бош тортган.

 

Украина ғалласини экспорт қилиш

 

Путин Россия Украинадан дон олиб чиқиб кетилишига қарши эмаслигини, аммо рус ғалласи экспортига қўйилган чекловнинг олиб ташланиши кераклигини айтган. Унинг сўзларига кўра, бу масала кўплаб давлатлар ва халқаро ташкилотлар билан муҳокама қилинган.

 

Европага газ етказиб бериш

 

“Европа давлатлари энергетика сиёсати ҳақида гап борар экан, улар энергиянинг анъанавий турларининг аҳамиятини англамади ва ноанъанавий  турларга эътибор қаратди. Улар ноанъанавий муносабатлар бўйича катта мутахассис, буни энергетикага ҳам жорий этмоқчи бўлишди."Газпром" доим ўз мажбуриятларини бажарган, бажаряпти ва бундан буён ҳам бажаради”, – деган Кремль раҳбари.

 

Шу билан бирга у Украинани газ етказиб бериш йўналишларидан бирининг ҳеч қандай сабабларсиз ёпиб қўйганини маълум қилган. Путин “Шимолий оқим-1” газ қувури фаолиятида муаммолар борлигини ҳам айтган. Шунингдек, “Шимолий оқим-2”нинг ишга туширишга тайёр эканини таъкидлаган.

 

Россия нефтининг нархига чекловлар ўрнатиш

 

Путиннинг сўзларига кўра, бу чора амалга оширилган тақдирда нефт нархи “осмон баробар кўтарилади”.