Номаълум вирус туфайли Ҳиндистонда дарслар бекор қилинди
Ҳиндистоннинг Уттар-Прадеш штати ҳокимияти номаълум иситма авж олгани сабабли 6 сентябргача 1-8 - синфлар учун мактаб дарсларини бекор қилишга қарор қилди. Касаллик дастлаб Фирозобод туманида аниқланди, деб хабар беради “India Today”.
Турли манбаларга кўра, Фирозобод туманида эликка яқин одам ўлган, уларнинг аксарияти болалар. Бундан ташқари Матҳурада 12 киши, Маинпурида 8 киши вафот этди.
Касаллик юқори иситма, тромбоцитлар сонининг кескин пасайиши ва кучли чанқаш билан тавсифланади. Касаллик тарқалган ҳудудларга махсус тиббий гуруҳлар юборилган. Беморлар қони текширилмоқда.
Шифокорларнинг фикрича, касалликни асосан чивинлар тарқатяпти.
Ҳозир Ҳиндистонда ёмғир мавсуми давом этмоқда. Бу даврда одатда чивинлар кескин кўпаяди.
Эслатиб ўтамиз, Ҳиндистоннинг Уттар-Прадеш штатида сўнгги бир ҳафта ичида номаълум вирусдан иситма қилиб 68 киши вафот этганди.
Насиба Тўхтаева
