Нурафшонда Президент мактаби очилди
Машғулотлар халқаро “STEAM — таълим” дастури асосида олиб борилади.
Президент мактабида таълим жараёни табиий фанлар, технологиялар, техник ижодкорлик, cанъат, математика соҳаларини чуқур ихтисослашган ҳолда ўқитишга асосланган.
Дарсларда тажрибали 2 нафар хорижлик мутахассис ва 20 нафар маҳаллий педагог сабоқ беради. Кейинчалик хориждан яна 10 нафар педагог-ўқитувчи жалб этилиши режалаштирилган.
Тадбирда Тошкент вилояти ҳокими Даврон Ҳидоятов барча замонавий шароитларга эга президент мактаби ҳудуддаги иқтидорли ўғил-қизлар учун кенг имкониятлар яратишини таъкидлади.
Президет таълим муассасалари агентлиги раҳбари Ҳилола Умарова билимга чанқоқ мактаб ўқувчиларини янги ўқув йили билан табриклади:
– Умид қиламанки, Президент мактаблари битирувчилари ватанимиз келажаги учун энг керакли кадр бўлиб етишишади.
Қайд этилишича, Тошкент вилоятида жорий йил ижтимоий соҳада бир қатор объектлар қурилиб, мукаммал таъмирланди. Замонавий мактаблар, боғчалар, маҳалла фуқаролар йиғинлари идоралари, поликлиникалар шулар жумласидандир. Мазкур таълим муассасаси учун 80 миллиард сўм маблағ ажратилди.
Эслатиб ўтамиз, Президент мактаби битирувчилари давлат ОТМларига имтиҳонсиз грант асосида қабул қилинади.
Аввалроқ Президент мактабига кимлар ишга қабул қилиниши, Президент мактаби ўқувчилари юқори натижалар кўрсатаётгани ҳамда Наманганлик қиз ҳам Президент, ҳам ал-Хоразмий номидаги мактаб синовидан ўтгани ҳақида хабар берилганди.
