Жамият
|
10 Ноябр 09:43
327
Жамият
|
10.11.2021, 09:43
327

Самарқадда ўқувчини калтаклаган ўқитувчи ишдан олинди

Паяриқ туманидаги мактабларнинг бирида математика ўқитувчиси ўқувчини таёқ билан ургани айтилмоқда.

 

Ижтимоий тармоқларда Самарқанд вилояти Паяриқ туманида яшовчи фуқаро Мавлуда Ғофурованинг мурожаат тарқалди. Мурожаатчининг айтишича, 8-синфда ўқийдиган ўғли O.Й. ни математика фани ўқитувчиси калтаклаган.

 

Фарзандим ҳожатхонага бориб келаётганда қўнғироқ чалиниб қолган. Ўртоғи билан дарсга кечикиб киргани учун ўқитувчиси хипчин билан савалаган. Натижада, боламнинг оёқлари кўкариб кетган. Ўқитувчи таёғи сингач, яна бошқасини олиб савалаган.

Мен болаларимни ўқишга юбораман, калтакланиши учун эмас. Нима учун боламни уради? Устозлари дарс берсин, урмасин! Шунчалик ваҳший даражада уриш мумкинми? Бунга ким чора кўради? Бундай ваҳший ўқитувчилар бизга керакмас, – дейди мурожаатчи аёл.

 

Шундан сўнг, «Дарё» мазкур мурожаат юзасидан Самарқанд вилояти халқ таълими бошқармаси билан боғланган. Муассаса Мавлуда Ғофурова мурожаатини ишчи гуруҳ билан бориб ўрганган.

 

Маълум бўладики, мазкур ҳолат Паяриқ туман халқ таълими бўлимига қарашли 75-умумтаълим мактабида юз берган. Ушбу хатти-ҳаракат ишчи гуруҳ аъзолари ва 8-синф ўқувчиси Й.О. нинг ота-онаси иштирокида ўрганилган. Мактабда математика фани ўқитувчиси Ш.Н. ҳақиқатдан ҳам болаларни калтаклагани аниқланди.

 

Натижада, педагогга хос бўлмаган мазкур ҳолатни содир этгани учун математика фани ўқитувчиси Ш.Н.га нисбатан интизомий жазо чораси қўлланилиб, вазифасидан озод этилди.

 

Аввалроқ Тошкентда имконияти чекланган қизни калтаклагани учун қидирувга берилган 27 ёшли йигит ушлангани ҳақида хабар берилганди.

 

Оламгир Абдиев