Орбан Украина ва Россия ўртасида воситачи бўла оладиган даражада таъсирга эга эмас — Зеленский
Украина президенти Венгрия бош вазирининг Украина ва Россия ўртасида воситачилик қилишга уринишлари ҳақида гапирди.
Зеленскийга кўра, фақат АҚШ, Хитой ёки Европа Иттифоқи каби йирик иштирокчилар воситачи бўлиши мумкин.
ЕИ раислигини олти ойга эгаллаган Виктор Орбан дастлаб Киевга, кейин Москвага ташриф буюриб, Зеленский ва Путинга аввалига вақтинчалик ўт очишни тўхтатишни эълон қилиш, сўнгра тинчлик музокараларига ўтишни кўриб чиқишни таклиф қилди.
"Мен унинг Москвага учишини билмагандим. Бу унинг мустақил танлови, лекин Орбан икки давлат ўртасида воситачи бўла олмайди. Фақат жиддий, кучли иттифоқчилар воситачи бўлиши мумкин", — дея таъкидлади Украина президенти душанба куни Варшавадаги матбуот анжуманида.
Зеленскийнинг сўзларига кўра, воситачи иқтисодий ва сиёсий жиҳатдан қудратли бўлиши ҳамда Россия иқтисодиётига таъсири ўтказа олиши ёки Россияникидан кучлироқ армияга эга бўлиши керак.
"Дунёда бундай давлатлар кам. Мен Америка Қўшма Штатлари ва Хитойни шундай давлатлар деб ўйлайман. Менимча, ЕИ ҳам бутун иттифоқ кўринишида воситачилик қила олади", — дея Зеленскийнинг сўзларини келтиради “Укринформ” агентлиги.
