Ўзбекистон–Қирғизистон–Хитой темирйўли қурилиши бошланади
Бу бўйича томонлар ўртасида ҳужжат имзоланди.
Бугун, 14 сентябрь куни Ўзбекистон Транспорт вазирлиги, Қирғизистон Транспорт ва коммуникациялар вазирлиги ҳамда Хитой Халқ Республикаси Тараққиёт ва ислоҳотлар давлат қўмитаси ўртасида “Ўзбекистон–Қирғизистон–Хитой” темирйўли қурилиши (Қирғизистон ҳудудида) лойиҳаси бўйича ҳамкорлик тўғрисида уч томонлама Битим имзоланди.
Темирйўл қурилиши бутун Марказий Осиё минтақасининг транспорт ва транзит салоҳиятини оширади. Магистрал Хитой, Қирғизистон ва Ўзбекистонни Каспий денгизи портлари ва ундан кейин Европа билан, келажакда эса Трансафғон темирйўли орқали Покистон портлари билан боғлаши мумкин.
Эслатиб ўтамиз, жорий йилнинг 21 май куни Қирғизистон ҳукумати 2022/2026 йилларда темирйўл транспортини ривожлантиришнинг асосий йўналишларини тасдиқлаганди. Унда Хитой–Қирғизистон–Ўзбекистон йўналиши бўйича темирйўл қурилишини кузда бошлаш режалаштирилган.
