Ўзбекистонда 6 нафар мансабдор шахс тадбиркорлик билан шуғулланаётгани аниқланди

 

Коррупцияга қарши курашиш агентлиги маълумотларига кўра, республикадаги 6 нафар раҳбар мансабдор шахс  (3 нафар туман-шаҳар ҳокими, 1 нафар агентлик, 1 нафар унитар корхона ва 1 нафар қўмита раҳбари) тадбиркорлик субъектларининг таъсисчилари эканлиги аниқланган.

 

Хусусан:

 

• Миллий антидопинг агентлиги директори А. Садиков «Total Oil» МЧЖ;

• «Ахборотлаштириш Бош маркази» ДУК раҳбари Д. Сариходжаев «Мусаммо» МЧЖ;

• Андижон вилояти Бўстон тумани ҳокими С. Носирова «Сабина Иссиқ Нонлари 777» ва «Кўмир Саноати» МЧЖлар;

• Навоий вилояти Қизилтепа тумани ҳокими У. Файзиев «Zarafshan Golden Group» ва «Zarafshon Grand Invest» МЧЖлар, «Ғани Бобо Чорваси» фермер хўжалиги;

• Тошкент шаҳар Яккасарой тумани ҳокими А.Сайфутдинов «Sanico Group» ва «Uv-Maks» МЧЖлар;

• Ипакчилик ва жун саноатини ривожлантириш қўмитаси раҳбари Б. Шарипов «Каромат Ойижон-Сурхон» фермер хўжалигида таъсисчи сифатида фаолият юритиб келаётганлиги аниқланди.

 

Таъкидланишича, аниқланган ҳолатлар бўйича мазкур давлат органлари ва ташкилотлари, шунингдек, уларнинг юқори турувчи идораларига Агентлик томонидан тегишли тақдимномалар киритилиб, юқоридаги манфаатлар тўқнашуви ҳолатларига барҳам берилиши (мансабдор шахсларнинг тадбиркорлик субъектларидаги фаолияти тугатилиши) чоралари кўрилмоқда.

 

Маълумот учун, Ипакчиликни ривожлантириш қўмитаси раиси Баҳром Шарипов «Kun.uz» ва журналист Шокир Шариповга нисбатан судга даъво аризаси киритганди.

 

Баҳром Шарипов ўз даъво аризасида «Kun.uz» мақоласидаги маълумотларни асоссиз деб атаган ҳамда бу ўзи ва оиласининг обрўсига путур етказганини қайд этган. У суддан таҳририят ва журналистни раддия эълон қилиш, омма олдида кечирим сўраш ва улардан маънавий зарар учун 1 миллиард сўм ундиришни сўраганди.

 

Кейинчалик Баҳром Шарипов «Kun.uz» ва журналист Шокир Шариповга нисбатан судга берган аризасини қайтариб олган.