Покистон бош вазири Имрон Хон унга нисбатан ишончсизлик вотуми эълон қилинган тақдирда, янги ҳукуматни тан олмаслигини билдирди. Бу ҳақда у миллатга мурожаат пайтида маълум қилган.
Бош вазирнинг сўзларига кўра, ишончсизлик вотуми ортидан мамлакатда ҳокимият тепасига “импорт ҳукумат” келиши хавфи бор.
“Мен буни тан олмайман”, – деган у.
Шу билан бирга Имрон Хон унинг истеъфога чиқарилишига бир неча ой давомида тайёргарлик кўрилган. У бунда Ғарбни айблаган.
Шунингдек, сиёсатчи фуқароларни 10 апрель куни умуммиллий тинч норозилик намойишларида иштирок этишга чақирган.
“Сиз мустақилликни сақлаб қолишингиз керак. Бу сизнинг бурчингиз”, – деб қўшимча қилган у.
Маълумот ўрнида: 8 март куни Покистон мухолифати Имрон Хонга ишончсизлик вотуми эълон қилишга уриниб кўрди. Улар бош вазирни мамлакат иқтисодиётини яхшилай олмаслик ва коррупцияда айблаган.
3 апрель куни Покистон парламенти вице-спикери Қосим Сури ишончсизлик вотуми конституцияга зид эканини маълум қилган. Шу куни мамлакат президенти Ориф Алви парламентни тарқатиб юборди. 7 апрель куни эса Покистон Олий суди парламентнинг тарқатиб юборилиши конституция нормаларига қарши эканини таъкидлади ва уни қайта тиклаш тўғрисида қарор чиқарди.
Аввалроқ Имрон Хон Россияга қарши санкцияларга қўшилишдан бош тортганди.