Путин Россияни НАТОга аъзо қилмоқчи бўлгани маълум қилинди
Бу ҳақда альянснинг собиқ бош котиби айтган.
Путин президентлигининг даври бошланишида Россияни НАТОга аъзо бўлиши учун жиддий ҳаракат қилган. Бу ҳақда альянснинг 1999-2004 йиллардаги бош котиби Жорж Робертсон маълум қилди.
Робертсоннинг сўзларига кўра, Путин у билан биринчи марта учрашганида “Бизни қачон НАТОга таклиф қиласиз?” деган савол берган. “Мен ўшанда ташкилотга таклиф қилинмаслигини, аъзо бўлишни истаганлар ўзи мурожаат қилишини айтганман. Шунда Путин “Биз бошқа давлатлар билан бир қаторда турмаймиз, Россия муҳимроқ аҳамиятга эга давлат”, деб жавоб берган”, – деган Робертсон.
Унинг таъкидлашича, Украинадаги 2004 йилги воқеалар Россия етакчисининг фикрини ўзгартирган. Путин бу ҳодисаларни НАТОнинг Шарққа қараб кенгайиши сифатида баҳолаган.
Аввалроқ НАТО Россияга қарши янги режа ишлаб чиқмоқчи эканлиги хабар қилинганди.
Жаҳонгир Қўзиев
