Қашқадарё вилояти Косон туманида сомон талашиб поччасини ўлдирган шахсга 18 йил қамоқ жазоси тайинланди. Бу ҳақда вилоят ИИБ ахборот хизмати хабар берди.
Маълум қилинишича, жорий йил 17 июнь куни Косон туманида икки нафар шахс далада сомон талашиб жанжаллашиб қолган. Шундан сўнг улардан бири иккинчисини машина шинасига ел берадиган насос билан уриб ўлдирган. Қотил ҳодисага гувоҳ бўлган болаларга ҳам ташланган, аммо улар қочиб кетган.
Дастлабки суриштирувларда аниқланишича, марҳум қотилнинг поччаси бўлган ва фермерлик билан шуғулланган. У оғзаки келишув билан қайнисини ишга олган ва унга буғдой ўрилгандан сўнг 1,5 тонна буғдой ва 2 гектар ернинг сомонини беришини айтган. Буғдой ўрилгандан сўнг сомон масаласида улар ўртасида келишмовчилик чиққан ва ўзаро жанжал пайтида қайни ўз поччасини машина шиналарига ел берадиган насос билан уриб ўлдирган.
Қайд этилишича, жиноят ишлари бўйича вилоят судида бўлиб ўтган суд мажлисида мазкур иш кўриб чиқилиб, суд тергов ҳужжатлари, жабрланувчилар ва гувоҳларнинг кўрсатмаларини ўрганиб ҳукм чиқарди.
Унга кўра, судланувчи Жиноят кодексининг 97-моддаси 2-қисми "ж" "р" банди билан айбдор деб топилиб, 18 йилга озодликдан маҳрум қилинди.
Маълумот учун: cўнгги 8 ойда қасддан баданга енгил шикаст етказган 47 нафар фуқаро қамалди. Жорий йилнинг биринчи ярим йиллиги давомида Ўзбекистонда жиноят ишлари бўйича судлар томонидан қасддан баданга енгил шикаст етказишда айбланган 1 686 нафар шахсга нисбатан 1 508 та жиноят иши кўриб чиқилган. Шундан 714 нафарига нисбатан айблов ҳукми, 4 нафар шахсга нисбатан оқлов ҳукми чиқарилган. 954 нафар шахсга тааллуқли жиноят ишлари эса тарафлар ярашганлиги муносабати тўхтатилган. 6 та жиноят иши бўйича 6 нафар шахсга нисбатан тиббий мажбурлов чораси қўлланилган.
Эслатиб ўтамиз, аввалроқ Андижонда эрини унитаз қопқоғи билан уриб ўлдирган 63 ёшли аёл қамалгани, ижарачи аёл шериклари томонидан “самосуд” қилингани, Сирдарёда 17 ёшли бола тенгдошини пичоқлаб қўйгани ҳамда суд сохта “давлат хизматчи”си ишига қонуний баҳо бергани ҳақида хабар берилганди.