Қирғизистон Ҳиндистондан ҳайвонлар импортини вақтинча тўхтатди
Чекловлар Nipah вирусига мойил ҳайвонлар, шунингдек, улар билан боғлиқ чорвачилик маҳсулотларини олиб киришга қаратилган.
Қирғизистон Республикаси Ҳиндистондан айрим турдаги ҳайвонлар ва чорвачилик маҳсулотлари импортига вақтинчалик тақиқ жорий этди. Мазкур чекловлар 28 январдан кучга кирди, деб хабар берди Қирғизистон Республикаси Қишлоқ хўжалиги ва озиқ-овқат вазирлиги матбуот хизмати.
Маълум қилинишича, чекловлар Nipah вирусига мойил ҳайвонлар, шунингдек, улар билан боғлиқ чорвачилик маҳсулотларини олиб киришни қамраб олади. Ушбу қарор мамлакат ҳудудида вирус тарқалишининг олдини олиш ҳамда ветеринария-санитария хавфсизлигини таъминлаш мақсадида қабул қилинган.
Nipah вируси хавфли зоонотик инфекция ҳисобланиб, ҳайвонлардан одамларга юқиши мумкин. Шу муносабат билан Ветеринария, чорвачилик, яйлов ва озуқа ишлаб чиқариш хизмати аҳолини келиб чиқиши номаълум бўлган чорвачилик маҳсулотларини харид қилмасликка, шунингдек маҳсулотларга илова қилинган ветеринария ҳужжатларининг мавжудлигига алоҳида эътибор қаратишга чақирди.
Ваколатли идоралар вазият доимий назорат остида эканини, эпидемиологик ҳолатга қараб чекловлар муддати қайта кўриб чиқилишини маълум қилди.
