Россиянинг С-400 ракета тизимининг харид қилиниши Туркия ва АҚШ ўртасида муносабатларнинг совуқлашишига асосий сабаблардан бири бўлди. Анқаранинг НАТО аъзоси бўлишига қарамай, ташкилотнинг асосий рақибларидан бири Россия қуролларини сотиб олиши Вашингтон норозилига асос бўлган.
Эрдўғаннинг сўзларига кўра, Американинг Patriot тизимини Туркияга сотмаслиги бошқа давлатлардан қурол сотиб олишга мажбур қилган. С-400 тизими энг мақбул вариант сифатида танланган. Президент АҚШ билан муносабатлар совуқлашиши масаласига тўхталиб: “Ўйлашимча, С-400 бунга арзийди. Биз мудофаа салоҳиятимизни кучайтиришимиз керак”, – деган.
Маълумот ўрнида: 2018 йилда АҚШ давлат департаменти Туркияга 3.5 миллиард долларга Patriot' тизимини сотишни маъқуллаган. Аммо кейинчалик бу қарор бекор қилинган. Шундан кейин Анқара Россия ракеталарига қизиқиш билдирган.
Аввалроқ Эрдўған Афғонистонда инклюзив ҳукумат тузиш кераклигини айтганди. Шунингдек, Сурия Туркиядан мамлакатни тарк этишни талаб қилганди.
Жаҳонгир Қўзиев