Россия 11 йил кўришмаган Эрдоған ва Асадни учраштиришга тайёрлигини билдирди
Бундан олдин Туркия Президенти суриялик ҳамкасби билан учрашиш эҳтимоли ҳақида гапирганди.
Россия Туркия ва Сурия Президентлари учрашувини ташкил этишга тайёр. Бу ҳақда РФ Президентининг Сурия бўйича махсус вакили Александр Лаврентьев маълум қилди.
“Менимча, Москва икки томонда хоҳиш бўлган тақдирда мулоқот майдонини тақдим этишга тайёр. Бунга шубҳа қилмайман”, — деган дипломат.
Шу билан бирга у бу учрашувни ташкил этиш учун маълум шароит етилиши кераклигини таъкидлаган.
Бундан олдин Ражаб Тоййиб Эрдоған Башар Асад билан учрашиш эҳтимоли ҳақида гапирганди. Айрим манбаларга кўра, икки давлат раҳбари учрашуви Владимир Путин воситачилигида бўлиб ўтиши мумкин.
