Россия армияси бўйича эксперт Майкл Кофман Украинадаги уруш ҳақидаги фикрларини эълон қилди. Бу ҳақда BBC хабар берди.
Кофманнинг фикрича, дастлаб рус армияси мобил гуруҳларнинг тезкор ҳаракати орқали муҳим объектлар ва шаҳарларни босиб олишни кўзлаган.
Аммо кейинчалик бу режа пучга чиқди: десант ва мобил гуруҳларга қўшимча кучлар ва ҳаводан ёрдам бўлмагани учун улар украин армияси томонидан тезда тор-мор этилди. Шунингдек, Киев ҳозирда ахборот урушида ҳам устунлик қилмоқда.
Лекин экспертнинг сўзларига кўра, шундан кейин Москва тактикани қайта кўриб чиқишни бошлади. У ҳозирда резерв кучлар сафини тўлдирмоқда ва қайтадан гуруҳлар тузилмоқда. Шунингдек, Россиянинг жуда катта ресурсларга эга эканлигига эътибор қаратилган.
Кофман руслар ҳали авиациядан ҳам тўлиқ фойдаланмаётганини таъкидлаган.
"Россия сиёсий раҳбарияти ҳануз ўз режасининг ҳалокатли эканини англаб етмади ва тезда Киевни ишғол қилиш фикридан қайтмаган. Улар ҳаво кучларидан тобора кенгроқ фойдаланмоқда. Афсуски, Фикримча, энг ёмони ҳали олдинда. Бу уруш янада даҳшатли тус олиши мумкин", — деган у.
Эслатиб ўтамиз, аввалроқ Европанинг уч давлати Киевга қўшимча самолётлар жўнатиши тўғрисида хабар берилганди.