Россия ва Эрон ўртасида ҳамкорлик битими тузилди

17 январь куни Москва шаҳрида Россия Президенти Владимир Путин ва Эрон Президенти Масъуд Пезешкиан ўзаро музокаралар якунида стратегик ҳамкорлик тўғрисидаги икки томонлама шартномани имзолашди.

 

Имзолаш маросимидан олдин икки давлат раҳбарлари ортасида Кремль саройида учрашув ўтказилди.

 

Россия ва Эрон ўртасидаги муносабатлар 2001 йилда имзоланган “Ўзаро муносабатлар асослари ва ҳамкорлик тамойиллари тўғрисидаги шартнома”га мувофиқ ҳолда ривожланиб келган. Мазкур ҳужжат ҳар беш йилда автоматик равишда узайтирилади. Сўнгги йилларда икки давлат ушбу ҳужжат янги геосиёсий шароит ва ҳамкорликнинг юқори даражасига жавоб бермаслигини таъкидлаб келишди. 2022 йил январь ойида Эрон Президенти Иброҳим Раисий билан Москва ташрифи давомида янги шартнома устида фаол иш бошлашга келишилган эди.

 

Эроннинг Россиядаги элчиси Казим Жалолий маълум қилишича, ҳужжат кириш сўзи ва 47 моддадан иборат бўлиб, икки давлат муносабатларини камида 20 йил давомида барча соҳаларда тартибга солади.

 

Расмийларнинг таъкидлашича, ушбу ҳужжат ҳарбий иттифоқ тузишни назарда тутмайди. Эрон ташқи ишлар вазири Аббос Ароқчийнинг қайд этишича, шартномада хавфсизлик ва мудофаа соҳаларида ҳамкорлик кўзда тутилган, аммо у ҳарбий иттифоқ тузиш мақсадини ўз ичига олмайди.

 

Комила Одилова тайёрлади