Ижтимоий тармоқларда март ойи аввалида Савдо-саноат палатаси Навоий вилояти бошқармаси бошлиғи этиб тайинланган, бунга қадар ҳоким ёрдамчиси бўлиб ишлаган Мерей Омонбоевага нисбатан жиноят иши қўзғатилгани ҳақида хабарлар тарқалди.
Савдо-саноат палатасининг расмий муносабат билдиришича, Ўзбекистон Республикаси Конституциясининг 28-моддасига асосан, жиноят содир этганликда айбланаётган шахс унинг айби қонунда назарда тутилган тартибда ошкора суд муҳокамаси йўли билан исботланмагунча ва суднинг қонуний кучга кирган ҳукми билан аниқланмагунча айбсиз деб ҳисобланади.
Шунингдек, Ўзбекистон Республикаси Меҳнат кодекси талабларига кўра, ходимни ишдан четлаштириш қонунчиликка мувофиқ ваколатли давлат органларининг талабига кўра амалга оширилиши белгиланган.
Бугунги кунга қадар Ўзбекистон Савдо-саноат палатасига ҳуқуқни муҳофаза қилиш органларидан M.Omonboyevani ишдан четлаштириш бўйича талабнома келиб тушмаган ва M.Omonboyeva Палатанинг Навоий вилояти ҳудудий бошқармаси бошлиғи лавозимида фаолиятини давом эттирмоқда.
"Мазкур ҳолат юзасидан ўрганиш натижалари бўйича қўшимча ахборот берилади", дейилади хабарда.