Шимолий Корея янги қанотли ракеталарни синовдан ўтказди
Шимолий Корея марказий телеграф агентлиги хабарига кўра, узоқ масофали қанотли ракеталарни ишлаб чиқариш сўнгги беш йилликдаги муҳим воқеалардан биридир.
Жорий йилнинг 11-12 сентябрь Шимолий Корея янги қанотли ракеталарни синовдан ўтказди. Унда Корея Меҳнат партичсининг юқори мартабали амалдорлари ҳам қатнашган. Мутахассислар ракета двигатели, учиши ва назорати синовларини ўтказган ва у муваффақиятли ўтган. Таъкидлашича, қанотли ракеталар 1,5 минг километр масофадаги нишонни йўқ қилган.
Шимолий Корея матбуоти ракета яратилиши стратегик аҳамият касб этиши ва мамлакат рақибларини “тийиб туриш”да муҳим восита эканини қайд этган.
Пентагон АҚШ ушбу синовлардан хабардор эканини, аммо ҳозирча вазиятни кузатишини маълум қилди.
Маълумот ўрнида: КХДР бир неча йиллардан буён ракета синовларини ўтказиб келади. Мамлакат оғир иқтисодий аҳволда бўлса-да, ядро дастуридан воз кечмаган. 2019 йилда АҚШ ва Шимолий Корея раҳбарлари учрашувида оммавий қирғин қуролларини ишлаб чиқаришни тўхтатишга келишилган.
Эслатиб ўтамиз, аввалроқ Шимолий Корея иқлим ўзгариши туфайли очарчилик ёқасига келиб қолгани ҳақида хабар берилганди.
Жаҳонгир Қўзиев
