Сурхондарёда ЙТҲ оқибатида “Matiz” ағдарилиб кетди
Сўнгги пайтларда содир этилаётган йўл транспорт ҳодисалари орасида автомобилларнинг ағдарилиб кетиш ҳолатларига ҳам тез-тез гувоҳ бўляпмиз. Буларнинг аксарияти, афсуски, ўлим ҳолатлари билан якун топмоқда. Куни кеча Термиз шаҳрида содир бўлган ЙТҲда “Matiz” автомобили ағдарилиб кетган.
Вилоят йўл ҳаракати хавфсизлиги бошқармаси маълумотига кўра, жорий йилнинг 7 сентябрь куни Термиз шаҳридаги Aлишер Навоий ва Денов кўчалари кесишган айланма ҳаракатда давлат рақами 10 R 985 RA бўлган “Cobalt” айланма ҳаракат орқали йўналиши бўйлаб ҳаракатланиб ўтаётган давлат рақами 75 116 ТТН бўлган “Мatiz”нинг орқа ўнг томонидан туртиб кетиши оқибатида йўл транспорт ҳодисаси содир бўлган.
Ҳар икки автомашинада бўлган ҳайдовчилар ҳеч қандай тан жароҳати олмаган.
Ҳозирда мазкур ҳолат юзасидан Термиз шаҳар ИИБ ЙҲХБ ДЙҲХХ томонидан суриштирув ишлари олиб борилмоқда.
Эслатиб ўтамиз, аввалроқ Қашқадарёда катта тезликда ҳаракатланган “Cobalt” автомобили “Lasetti” билан тўқнашиб, ағдарилиб кетгани, Навоийда бошқарувни йўқотган “Nexia”нинг ағдарилиб кетиши оқибатида икки киши вафот этгани ҳамда Тошкентда “Nexia” билан тўқнашган “Matiz” билан ҳам худди шундай ҳодиса юз бергани ҳақида хабар берилганди.
Баҳринисо Мадумарова тайёрлади.
