Ҳуқуқ-тартибот органлари “Taftish.uz” номи остида фаолият юритган жиноий гуруҳ аъзоларига нисбатан жиноят ишини тергов қилмоқда. Маълум қилинишича, 27 нафар фуқаро 21 та ҳолат бўйича ушбу медиа платформа ходимларининг ноқонуний ҳаракатларидан жабрланганини билдирган. Шундан сўнг гумонланувчилар процессуал тартибда ушланган.
Тергов материалларига кўра, Элита-медиа МЧЖга алоқадор “Taftish.uz” вакиллари очиқлик ва жамоатчилик назорати шиори остида фаолият юритиб, аслида товламачилик ва фирибгарликни даромад манбаига айлантирган. Жиноий гуруҳга норасмий раҳбарлик қилган Ғайрат Абераев ҳамда унинг шериклари фуқароларни обрўсизлантирувчи видеолар билан таҳдид қилиб, уларни интернетдан ўчириш эвазига пул талаб қилган.
Хусусан, Тошкент ва Самарқанд вилоятларида тадбиркорлар билан боғлиқ можаролар атайлаб бир томонлама ёритилиб, сўнгра материалларни олиб ташлаш учун ўнлаб миллион сўм маблағ талаб қилинган. Айрим ҳолатларда пулларни «шартнома» билан ниқоблашга уринишлар ҳам аниқланган. Тадбиркорлар босим ва таҳдидлар сабаб мажбуран пул ўтказган.
Шунингдек, тергов давомида айрим жабрланувчиларнинг шаъни ва қадр-қимматини камситувчи ёлғон видеолар тарқатилгани, суд ишларига аралашилган ҳолатлар ҳам фош бўлган. Ҳозирда гумонланувчиларга нисбатан Жиноят кодексининг туҳмат, фирибгарлик, товламачилик ва ёлғон ахборот тарқатиш билан боғлиқ моддалари асосида айбловлар қўйилган. Ички ишлар вазирлиги бошқа жабрланган фуқароларни ҳам тергов органларига мурожаат қилишга чақирди.