Хабарда айтилишича, Афғонистондаги сўнгги ҳодисалар ортидан Бутунжаҳон озиқ-овқат дастурининг Покистон, Тожикистон ва Ўзбекистондаги пунктларида энг зарурий товарларнинг заҳираси кўпайтирилган.
Бу маҳсулотларнинг барчаси Афғонистонга юборилади. Хусусан, Покистондаги “Торхам” назорат пункти орқали сўнгги уч ҳафтада гуманитар ёрдам ортилган 2 колонна жўнатилган. 13 сентябрь куни эса БМТ Қочқинлар масаласи Олий Комиссари бошқармаси Нангарҳор вилоятига ёрдам юборган.
Жаҳон ҳамжамияти Афғонистондаги гуманитар вазиятдан хавотирда. Сўнгги маълумотларга кўра, 97 фоиз афоғонистонлик қашшоқлик ёқасида турибди. 14 миллион фуқарога эса очлик хавф солмоқда. БМТ Женевада ташкил этилган йиғилишда Афғонистон учун 1 миллиард доллардан ортиқ маблағ ажратилишини эълон қилган. 14 сентябрь куни Европа Иттифоқи афғон халқига қўшимча 100 миллион евро ёрдам беришини эълон қилди.
14 сентябрь куни Ўзбекистон Республикаси Афғонистонга 1 минг 300 тонна маҳсулот юборди. Балх вилоятида Ўзбекистон Республикаси Президентининг махсус вакили Исматулла Эргашев ва Сурхондарё вилояти ҳокими Тўра Боболов расмийлар билан учрашув ўтказган.
Маълумот ўрнида: 15 август куни “Толибон” ҳаракати Кобулни эгаллаган. 31 августда АҚШ Афғонистонни тўлиқ тарк этди. Ҳаракат томонидан эгалланмаган ягона вилоят Панжшер эди. Аммо 6 сентябрда ушбу ҳудуд ҳам “Толибон” назоратига ўтди. Шундан кейин толиблар 7 сентябрь куни мамлакатнинг янги ҳукумати тузилаганини эълон қилди.
Жаҳонгир Қўзиев