“Толибон” Афғонистондаги ИШИД террорчилари ҳақида маълумот берди
“Толибон” расмий вакили Забиҳулло Мужоҳиднинг сўзларига кўра, Афғонистонда ИШИД жангарилари сони кўп эмас. Бу ҳақда у “Риа Новости”га берган интервьюсида айтиб ўтган.
Мужоҳид ҳозирда толиблар ИШИД жангариларини тўлиқ йўқ қилишга ҳаракат қилаётганини айтган. “Ўтган йиллар давомида биз уларнинг сонини Кобул ва Жалолободда камайтиришга муваффақ бўлдик. ИШИД жангарилари бор, аммо террорчиларнинг сони кўп эмас. Биз тезкор разведка тадбирлари орқали жангариларни топиб, қамоққа оляпмиз”, – деган ҳаракат расмий вакили.
ИШИД ҳозирда Афғонистон барқарорлигига асосий тўсиқ сифатида кўрилмоқда. 26 сентябрь куни Кобул халқаро аэропортида уюштирилган терактга айнан шу террорчи гуруҳ жавобгарликни зиммасига олди.
Маълумот ўрнида: 15 август куни “Толибон” ҳаракати Кобулни эгаллаган. 31 августда АҚШ Афғонистонни тўлиқ тарк этди. Ҳаракат томонидан эгалланмаган ягона вилоят Панжшер эди. Аммо 6 сентябрда ушбу ҳудуд ҳам “Толибон” назоратига ўтди. Шундан кейин 7 сентябрь куни мамлакатнинг янги ҳукумати тузилгани эълон қилинди.
Бундан аввал “Толибон” Россиядан наркотрафикка қарши курашда ёрдам сўрагани ҳақида хабар берилганди.
