Тошкент аэропортида салкам 10 минг дона “кофе” тўхтатиб қолинди
Уларнинг таркибида кучли таъсир қилувчи модда бўлган.
Тошкент халқаро аэропорти чегара-божхона пости ходимлари томонидан “Истанбул-Тошкент” йўналиши бўйича учиб келган бир гуруҳ Ўзбекистон Республикаси фуқаролари тегишли тартибда божхона назоратидан ўтказилди.
Унга кўра, фуқароларнинг қўл юклари ва багажлари текширилганда, божхона назоратига белгиланган тартибда тақдим этилмаган, сифат кўрсаткичларини тасдиқловчи ҳужжатларга эга бўлмаган, ҳеч қандай рухсатномасиз жами 358 қути ичида 9 210 дона “KETO FORM SLIMMER COFFEE” номли биоактив моддаларга ўхшаш кукунсимон маҳсулотлар борлиги аниқланди.
Судга оид кимёвий экспертиза хулосаларига кўра, мазкур маҳсулотлар таркибида “сибутрамин” ва “кофеин” моддалари мавжуд бўлиб, “сибутрамин” моддаси “Кучли таъсир қилувчи моддалар” рўйхатидаги республика ҳудудида муомаласи чекланган кучли таъсир қилувчи моддалар рўйхатига киритилганлиги маълум қилинган.
Ҳозирда мазкур ҳолатлар юзасидан божхона органлари томонидан Жиноят Кодексининг тегишли моддалари билан жиноий иш қўзғатилди.
