Тошкентда ИИБ ходимлари билан жанжаллашган эркак қамалди
У 3 та модда бўйича жавобгарликка тортилган.
Ижтимоий тармоқларда Тошкент шаҳрида эркак кишининг ИИО ходимларига қаршилик кўрсатаётганлигини акс этган видео тарқалиб, турли муҳокамаларга сабаб бўлмоқда. Пойтахт ИИББ ахборот хизмати ҳолат юзасидан муносабат билдирди.
Кеча, 14 май куни соат 18:00 ларда шаҳар ИИББ ЙҲХБ ходимлари 1986 йилда туғилган И.Д. томонидан ҳеч қандай ҳужжатларсиз бошқариб юрилган TOYOTA русумли транспорт воситасини маъмурий баённома асосида Шайхонтоҳур туманидаги жарима майдончаларидан бирига олиб келишган. Бироқ ҳужжатларни расмийлаштириш жараёнида I.D. жамоат тартибини бузиб, ички ишлар органлари ходимларининг қонуний талабларини бажармай, уларга нисбатан қаршилик кўрсатган.
Мазкур ҳолат юзасидан фуқаро М.Д.гa нисбатан Маъмурий жавобгарлик тўғрисидаги кодекснинг 183-моддаси (“Майда безорилик”), 194-моддаси (“Ички ишлар органлари ходимининг қонуний талабларини бажармаслик”) ва 195-моддаси (“Ички ишлар органлари ходимларининг ўз хизмат бурчларини бажаришларига қаршилик кўрсатиш”) билан маъмурий баённома расмийлаштирилган ҳамда жиноят ишлари бўйича Шайхонтоҳур тумани суди томонидан унга нисбатан 10 сутка маъмурий қамоқ жазоси тайинланган.
