Тошкентда майнинг фирма ташкил қилганлар ушланди
Ҳозирда ҳолат юзасидан жиноий иш очилган.
Тошкент шаҳри ва Хоразм вилоятида майнинг ферма ташкил этган шахслар аниқланди. Бу ҳақда Бош прокуратура ҳузуридаги Иқтиосодий жиноятларга қарши курашиш департаменти хабар берди.
Қайд этилишича, Янгибозор тумани “Янгиёп” МФЙдаги хонадонда яшовчи Ж.Т. ўз уйида 2 та тўпламдаги майнинг крипто-активлари қурилмасини тижорат мақсадида умумий фойдаланишдаги электр тармоғига ўғрилик йўли билан улаб, жами 321 млн сўмлик электр энергиясидан ноқонуний фойдаланганлиги аниқланган.
Шунингдек, Олмазор туманида ўтказилган тезкор тадбирда “Намуна” МФЙдаги хонадонда яшовчи О.Ш. ўз уйида майнинг крипто-активлари қурилмасини тижорат мақсадида умумий фойдаланишдаги электр тармоғига ўғрилик йўли билан улаб, жами 65,3 млн сўмлик электр энергиясидан ноқонуний фойдаланганлиги аниқланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
