Тошкентдаги автобус ҳайдовчилари энди дўппи кияди
Аёллар учун ҳам миллий либослар элементлари танланган.
Ўзбекистон пойтахтида жамоат транспорти ҳайдовчилари шаҳар ҳокимиятининг миллий кийим кийиш борасидаги янги ташаббусига амал қила бошлади. “Тошшаҳартрансхизмат” компанияси ҳар жума куни ўтказиладиган “Миллий кийим куни” жорий этилишини эълон қилди.
Шаҳар аҳолиси ва меҳмонлари ўртасида миллий қадриятларни кенг тарғиб этишга қаратилган ушбу ташаббусда давлат ташкилотлари ходимлари жума кунлари миллий либосларда юришади. “Тошшаҳартрансхизмат” фармойиши ижросига алоҳида эътибор билан ёндашди. Жумладан, 67 ва 91-сонли йўналишдаги автобус ҳайдовчилари миллий бош кийимлар – дўппиларда иш бошлади. Ташаббусга автобус ҳайдовчиси аёллар ҳам қўшилиб, миллий либослар элементларини танлашди.
