Украина НАТОга қўшилишга тайёр эмас — Байден
Бу масала можаро тугаганидан кейин кўриб чиқилиши мумкин.
АҚШ Президенти Жо Байденнинг фикрича, Украинанинг Шимолий Атлантика иттифоқига қўшилиши масаласи фақат уруш тугаганидан кейин кўриб чиқилиши мумкин.
"Украина ҳозир уруш авжида, НАТОга аъзо бўлишга тайёр эмас. Альянс аъзолари ўртасида ҳозир Украинани қабул қилиш борасида якдиллик йўқ", — деди у.
Шу билан бирга, Байден АҚШ ва НАТО иттифоқчилари Президент Владимир Зеленский ҳамда Украина мудофаа кучларини Россия билан урушни тугатиш учун зарур бўлган қуроллар билан таъминлашда давом этишини таъкидлади.
Америка Қўшма Штатлари Украинага Исроилга ўхшаш хавфсизлик кафолатларини бериши мумкин, аммо бу Шимолий Атлантика иттифоқига қўшилишни назарда тутмайди.
Эслатиб ўтамиз, аввалроқ Украина Президенти Владимир Зеленский Америка етакчиси Жо Байденни Украина Россия билан уруш тугагандан кейингина альянсга аъзо бўлиши мумкин бўлса ҳам, ҳозир НАТОга таклиф қилишга чақирган эди.
