Вашингтон Россия ғалласи экспортига қарши эмас
Бу ҳеч қайси санкцияларни бузмаслиги маълум бўлди.
Вашингтон Россиянинг глобал бозорга озиқ-овқат маҳсулотлари етказиб беришига тўсқинлик қилмайди. Бу ҳақда АҚШ президентининг миллий хавфсизлик бўйича маслаҳатчиси ўринбосари Жонатан Файнер маълум қилди.
"Биз Украинанинг кўпроқ маҳсулот экспорт қилиши йўлларини қидиряпмиз. Очиғини айтганда, Россиянинг дон ва бошқа махсулотларни сотишига қарши эмасмиз. Тижорий ташкилотларнинг РФдан ғаллани ҳеч қайси санкцияларни бузмасдан импорт қилишларини тушунтиришга ҳаракат қиляпмиз", — деган у.
Файнернинг сўзларига кўра, ҳозирда Украина буғдойини олиб чиқишнинг учта йўли бор: Ғарбга темирйўл ва автомобиль транспорти орқали, шимолдан Беларусь орқали ҳамда Қора денгиз орқали. Шу билан бирга Беларусь орқали олиб чиқиш муаммоли, чунки Киев ва Минск ўртасидаги муносабатлар яхши эмас. Сиёсатчининг сўзларига кўра, энг оптимао вариант — Одесса портлари орқали экспортни амалга ошириш.
Аввалроқ Одесса портидан уч хавфсизлик йўлаги очилиши ва шу орқали дон экспорти амалга оширилиши тўғрисида хабар берилганди.
