Виниcиусга Саудиядан жиддий таклиф бўлмоқда

 

Саудия клублари жорий трансфер ойнасида нисбатан фаоллик кўрсатмади. Энг қиммат харид - 60 миллион еврога "Астон Вилла"дан Мусса Диаби бўлди. Лекин, ҳозирда саудияликлар ақлдан озган трансферни амалга оширишга тайёр. Хабарларда айтилишича, Саудия Арабистони давлат инвестиция фонди вакиллари мамлакат спорт вазирлиги билан ҳамкорликда Виниcиус Жуниор билан музокаралар олиб бормоқда. Улар "Реал"нинг бразилиялик вингери учун 1 миллиард евро тўлашга тайёр.

 

"Аtletic" нашри эҳтимолий келишув тафсилотлари ҳақида маълумот берди. Қайд этилишича, Виниcиусни "Ал-Аҳли" клуби сотиб олмоқчи. Бразилиялик футболчи бир ойдан бери давом этаётган музокаралардан хабардор. Саудия жамғармаси жараёнда иштирок этаётган томонларга, ҳам Винициусга, ҳам “Реал Мадрид”га ноқулайлик туғдирмасликка ҳаракат қилмоқда. Футболчи клублар ўртасида ижобий қарор бўлса, "Ал-Аҳли"дан расмий таклиф кутмоқда. "Реал" вингер билан хайрлашмоқчи эмас, лекин унинг шартномасида товон пули 1 миллиард евро (Виниcиус "Реал" билан 2027 йилгача янги шартнома имзолаган). Маълум қилинишича, саудияликлар Виниcиусга 1 миллиард евро маош + бонуслар билан беш йиллик шартнома таклиф қилмоқчи - тарихда бундай ҳолат ҳали ҳеч қачон кузатилмаган.

 

Нега Саудия Арабистони бир футболчи учун шунча пул сарфламоқчи? Ҳамма гап 2034 йилги жаҳон чемпионати учун қилинаётгани айтилмоқда. Саудия Арабистони ҳали расман мусобақага мезбонлик қилиш ҳуқуқини олмаган, бироқ ариза берган ягона давлат бўлиб турибди. Демак, жаҳон чемпионати Арабистон ярим оролида ўтказилишига шубҳа йўқ. Давлат жамғармаси эса Виниcиусни мамлакат элчиси ва Саудия Лигасининг юзига айлантирмоқчи.

 

Агар трансфер амалга ошса, бразилиялик тарихдаги энг қиммат ва энг кўп маош олувчи спортчига айланади. Эслатиб ўтамиз, футбол тарихидаги энг йирик харид Неймарнинг 2017 йилда 222 миллион евро эвазига "Барселона"дан "ПСЖ"га ўтгани бўлган. Энг кўп маош оладиган футболчи эса Криштиану Роналду ("Ал-Наср"да йилига 200 миллион евро олади).

 

Аммо, "Тhe Atletic" нашрининг ёзишича, Виниcиус Саудия Арабистонининг дастлабки таклифини рад этган. У "Реал Мадрид"да бахтли ва "Олтин тўп"ни қўлга киритишни хоҳлайди. Бироқ, "Ал-Аҳли" товон тўлаш бандини фаоллаштирса, вазият ўзгаради. Саудия Арабистони Давлат инвестиция жамғармаси Виниcиуснинг дастлабки рад жавобига қарамай, келишувни янада фаоллаштириши қайд этилган.