Хитойнинг шарқий ҳудудида археологлар томонидан тахминан 7000 йил аввал ишлатилган ўт ёқиш асбоби топилди.
Мазкур қадимий буюмлар Тсянсу провинциясидаги Тсаоянгганг деб номланган манзилгоҳ қазилмалари чоғида аниқланган. Топилмалар орасида 60 см узунликдаги ёғоч бурғу ҳамда 30 см узунликдаги ўт ёқиш тахтаси бор. Тахтанинг бир четида думалоқ тешик мавжуд бўлиб, у арқон боғлаш учун ишлатилган бўлиши мумкин.
«Синхуа» ахборот агентлигининг таъкидлашича, бу кашфиёт Хитой ҳудудида ҳозиргача топилган энг қадимги ўт ёқиш технологиясига оид далил ҳисобланади. Хитой маданий ёдгорликлари жамияти аъзоси Лю Чженнинг сўзларига кўра, ушбу топилма Хитой цивилизациясининг дастлабки босқичлари ҳақида муҳим маълумот беради.