Хоразмда ўқитувчилар ойлигидан ушлаб қолинаётгани айтилди
Ҳолат юзасидан расмий маълумот берилди.
Ижтимоий тармоқларда Хоразм вилояти Боғот тумани Мактабгача ва мактаб таълими бўлими бошлиғи томонидан ўқитувчиларнинг ойлик маошидан турли хил баҳоналар билан Экологик партия, Қизил ярим ой жамияти учун ушлаб қолинаётганлиги ҳақида хабар тарқалди.
Ойлик маошларини ҳисоблаш ведемостлари ўрганилганида ўқитувчиларнинг ойлик маошларидан Экологик партия, Қизил ярим ой жамияти учун маблағ ушлаб қолинганлиги ҳолати ўз исботини топмаган.
Боғот тумани ҳокимининг 2024 йил 30 мартдаги 1-11-01-сонли тавсиявий хати асосида тумандаги айрим таълим ташкилотларида фаолият юритувчи ходимларнинг ихтиёрий равишдаги аризалари асосида уларнинг ойлик маошидан маблағ ушлаб қолинганлиги аниқланган.
Хусусан, тумандаги мавжуд таълим муассасаларида фаолият олиб бораётган жами 4451 нафар ходимнинг 1025 нафаридан 76 605,8 минг сўм маблағ ходимларнинг розилик аризасига кўра шанбалик учун «Маҳалла» хайрия жамғармасига ўтказилганлиги аниқланган.
Ушбу ҳолат ўқитувчиларнинг розилиги асосида ихтиёрий равишда амалга оширилган бўлсада, эндиликда ушбу маблағларни қайтариш бўйича қайта ведемост шакллантирилиб, ўтказилган маблағларни qaytarib олиш юзасидан вилоят Назорат тафтиш бошқармаси билан келишилган.
