Европа Иттифоқи ўз тарихида илк бор ҳарбий машғулотлар ўтказиши мумкин
Бу 2023 йилда амалга оширилади.
Европа Иттифоқи 2023 йилда ўз тарихида илк бор ҳарбий машғулотлар ўтказиши мумкин. Бу ҳақда El Pais газетаси маълум қилди.
Газета қўлга киритишга муваффақ бўлган махфий ҳужжатда Европа иттифоқининг “ўз дунёқарашини илгари суриши ва манфаатларини ҳимоя қилиши учун” зарур бўлган қуролли кучларга эгалик қилиш зарурлиги ҳақида сўз боради.
“2023 йилдан бошлаб биз доимий ҳарбий, хусусан, ҳарбий-денгиз машғулотлари ўтказамиз”, – дейилади ҳужжатда.
Ушбу ўқув машғулотлари Европа Шошилинч чора кўриш кучлари тузилишига ёрдам беради. Бу кучлар сони 2025 йилга келиб 5 мингни ташкил этиши мумкин. Шунингдек, ҳужжатда ЕИ давлатлари қуролли агрессия пайти ўзаро ёрдам беришини кучайтириш мақсадида доимий машғулотлар ўтказилиши давом эттирилади. Қайд этилишича, ушбу ташаббус Евроиттифоқ давлатлари ташқи ишлар ва мудофаа вазирлари йиғилишида муҳокама қилинади.
Европа Иттифоқи иқтисодий интеграцияга эриша олган бўлса-да, ягона Европа қуролли кучлари масаласи ҳамон тузилмай келмоқда. Ҳозирда иттифоққа аъзо давлатларнинг деярли барчаси НАТОга аъзо ва айнан ушбу альянс Европа хавфсизлигида ҳал қилувчи ўринга эга.
Аввалроқ Европа Иттифоқининг Украинада ҳарбий миссияси очилиши мумкинлиги ҳамда НАТО бош котиби Йенс Столтенберг Европа иттифоқи армиясини тузиш мақсадга мувофиқ эмаслиги ҳақида фикр билдиргани хабар қилинганди.
Жаҳонгир Қўзиев
