Европа Россия газига муқобил қидириш жараёнида Африкани “эслаб қолди”. Anadolu агентлигининг хабарига кўра, Евроиттифоқ Нигериядан газ импортини кўпайтирмоқчи.
Шу муносабат билан мамлакат пойтахти Абуджа шаҳрида Нигерия миллий нефть корпорацияси раҳбари Малам Меле Кьяри ЕИ вакиллари билан учрашди.
“Биз Нигерия учун нафақат йирик мижоз, балки унинг нефть-газ саноатидаги асосий ҳамкоримиз. Чунки бу мамлакатда Европа компаниялари ишлайди. Шунинг учун бизни умумий манфаатлар боғлаб туради”, – деган Европа Иттифоқининг Нигериядаги элчиси Самуэла Исопи.
Меле Кьяри ҳам унинг давлати жаҳон бозорига табиий газ импортини кўпайтириш ниятида эканини маълум қилган.
Маълумот ўрнида: Нигерия Европага суюлтирилган табиий газ етказиб бериш бўйича тўртинчи ўринда туради. Унинг 40 фоиз гази ЕИга экспорт қилинади.
Шунингдек, нефть захиралари бўйича у дунёда саккизинчи ўринни эгаллайди. Аниқланган нефть заҳиралари 37 миллиард баррелдан ортиқ. (дунёнинг 3.1 фоиз нефти). Мамлакат нефть хомашёсини қазиб олишда 15 етакчи давлатлардан бири. Унинг экспорти бўйича олтинчи ўринда туради.
Нигериянинг Риверс ва Дельта штатлари кунига 1.5 миллион баррель “қора олтин” қазиб олиниши мумкин.
Аввалроқ OPEC Россия нефтининг ўрнини боса олмаслиги ҳақида хабар берилганди.