ЕИ позициясидан қатъий назар Берлин Россия нефтидан воз кечмоқчи
Шунингдек, ҳозирда муқобил етказиб берувчилар билан музокаралар ўтказилмоқда.
Германия йил охирига қадар Россия нефти импортидан воз кечади. Бу ҳақда Bloomberg агентлиги хабар берди.
Унга кўра, Олаф Шольц ҳукумати Москванинг Украинадаги ҳаракатларига жавоб чоралари сифатида рус "қора олтин"идан воз кечади. Ҳозирда Берлин бошқа етказиб берувчилар билан музокаралар олиб бормоқда. Аммо айнан қайси давлатлардан нефть сотиб олиниши ҳозирча ошкор қилинмаяпти. Bloomberg билан суҳбатлашган манбалар Германия ҳукуматининг олти-етти ой ичида логистика билан боғлиқ масалаларни ҳал қилишига ишонч билдирган.
Агентлик суҳбатдошларининг қўшимча қилишича, нефть импортини тўхтатиш Евроиттифоқнинг эмбаргосидан қатъий назар амалга оширилади. Европанинг қатор давлатлари Россия нефтидан ҳозир воз кеча олмаслигини айтмоқда. Бу эса ЕИнинг рус "қора олтин"ига эмбарго жорий эта олмаслигига сабаб бўляпти.
Аввалроқ Европанинг Россия углеводородларидан воз кечиши учун қанча маблағ зарурлиги очиқланганди.
