Зеленский Япония парламентига виртуал тарзда мурожаат қилди
Япония Украинани қўллаб-қувватлайди.
Украина президенти Владимир Зеленский Япония парламентига виртуал мурожаатида қонунчиларни Россияга қарши санкцияларни давом эттиришга чақирди.
Бу ҳақда АП хабар бермоқда.
Зеленскийнинг нутқи юзлаб депутатлар, жумладан, Бош вазир Фумио Кисида билан гавжум бўлган парламент залида жонли эфирда намойиш этилди.
Зеленский Японияни Россияга санкция қўйган биринчи Осиё давлати бўлганини олқишлади ва Токиодан янада узоқроққа боришни сўради. Унинг сўзларига кўра, Россия билан савдо-сотиқни тақиқлаш ва хорижий компаниялар ўз сармояларининг Россияга кириб келишига йўл қўймаслик керак.
Шунингдек, Киев раҳбари Россиянинг ядровий ва кимёвий қуроллардан фойдаланиш эҳтимоли ҳақида ҳам хавотирда эканини маълум қилган.
Япония томон Украинани қўллаб-қувватлашини билдириб, украиналик қочқинларни қабул қилишга ваъда берди.
Шу ҳафтада Россия Токио санкцияларига асосланиб, баҳсли Курил ороллари бўйича Япония билан тинчлик шартномаси бўйича музокараларни тўхтатиб, у ердаги қўшма иқтисодий лойиҳалардан чиқишини эълон қилди.
