BMTning tavsiyalari hayotga tadbiq etilmoqda
Qonun loyihasida qator qonun hujjatlariga o‘zgartish va qo‘shimchalar kiritish ko‘zda tutilmoqda.
2021 yil 15 iyul kuni Oliy Majlis Qonunchilik palatasining Xalqaro ishlar va parlamentlararo aloqalar qo‘mitasi tomonidan O‘zbekiston Respublikasi Prezidentining “2017–2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Yoshlarni qo‘llab-quvvatlash va aholi salomatligini mustahkamlash yili”da amalga oshirishga oid Davlat dasturining 270-bandi O‘zbekiston Respublikasi normativ-huquqiy hujjatlari va dasturiy hujjatlarida tizimli aks ettirilishi masalalari muhokamasiga bag‘ishlangan qo‘mita yig‘ilishi o‘tkazildi.
Yig‘ilish davomida ishtirokchilar tomonidan BMTning voyaga yetmaganlar o‘rtasida jinoyatchilikning oldini olish uchun boshqaruv prinsiplari BMT Bosh Assambleyasining 1990-yil 14-dekabrdagi 45/112-sonli Rezolyusiyasi bilan qabul qilinganligi va rezolyusiyada barcha a’zo davlatlar jinoyatchilikning oldini olish bo‘yicha dasturlar ishlab chiqishda Ar-Riyod boshqaruv prinsiplarini milliy qonunchilikda, davlat siyosati va amaliyotda qo‘llashga chaqirilganligi ta’kidlandi.
Shundan kelib chiqib, milliy qonunchilikka BMTning Voyaga yetmaganlar o‘rtasida huquqbuzarliklarning oldini olish bo‘yicha ko‘rsatmalarining asosiy qoidalarini kiritish orqali voyaga yetmaganlar o‘rtasida huquqbuzarliklar profilaktikasi mexanizmlarini takomillashtirish maqsadida Oliy Majlis Qonunchilik palatasi tomonidan “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasi ishlab chiqilgan.
