Pompeoga sovg‘a qilingan 5800 AQSH dollarlik viski qayerga yo‘qoldi?
Maʼlumotlarga ko‘ra, viskini Pompeoga 2019 yilda Yaponiya hukumati sovg‘a qilgan. Shuningdek, unda “nomaʼlum farmoyish” belgisi bo‘lgan.
Amaldagi qonunlarga ko‘ra, Amerikalik mansabdor shaxs va davlat arboblari bahosi 390 dollardan oshgan sovg‘a olishi mumkin emas. Narxi agar undan oshsa, cho‘ntagidan g‘aznaga pul o‘tkazish bilan sotib olishi yoki uni Milliy arxivga topshirishi kerak bo‘ladi.
Pompeoning viskini o‘zlashtirgani haqidagi mish-mishlar tarqalganidan so‘ng uning advokati matbuotda chiqish qildi. U mijozi viski haqida hech narsa bilmasligi, bu sovg‘ani umuman eslolmasligini aytgan.
Sobiq davlat kotibining o‘zi ham Amerika telekanallaridan biriga bergan intervyusida sovg‘aning yo‘qolishi AQSHning hozirgi tashqi ishlar idorasi jamoasining aybi ekaniga shaʼma qilgan.
“Agar bu bir quti diyetik kola bo‘lganida edi, men uni jon deb qabul qilgan bo‘lardim”, - degan Pompeo va sovg‘ani izlashga tayyorligini bildirgan.
Sharofat Mahmudova
