Nomaʼlum virus tufayli Hindistonda darslar bekor qilindi
Hindistonning Uttar-Pradesh shtati hokimiyati nomaʼlum isitma avj olgani sababli 6 sentyabrgacha 1-8 - sinflar uchun maktab darslarini bekor qilishga qaror qildi. Kasallik dastlab Firozobod tumanida aniqlandi, deb xabar beradi “India Today”.
Turli manbalarga ko‘ra, Firozobod tumanida elikka yaqin odam o‘lgan, ularning aksariyati bolalar. Bundan tashqari Mathurada 12 kishi, Mainpurida 8 kishi vafot etdi.
Kasallik yuqori isitma, trombotsitlar sonining keskin pasayishi va kuchli chanqash bilan tavsiflanadi. Kasallik tarqalgan hududlarga maxsus tibbiy guruhlar yuborilgan. Bemorlar qoni tekshirilmoqda.
Shifokorlarning fikricha, kasallikni asosan chivinlar tarqatyapti.
Hozir Hindistonda yomg‘ir mavsumi davom etmoqda. Bu davrda odatda chivinlar keskin ko‘payadi.
Eslatib o‘tamiz, Hindistonning Uttar-Pradesh shtatida so‘nggi bir hafta ichida nomaʼlum virusdan isitma qilib 68 kishi vafot etgandi.
Nasiba To‘xtayeva
