O‘zbekistonda saylovlarni o‘tkazish amaliyoti sifat jihatidan yangi bosqichga ko‘tarildi
Shavkat Mirziyoyev Mustaqillikning 30 yilligi bayrami tadbirida bo‘lajak prezidentlik sayloviga doir muhim fikrlar bildirdi.
“Oldimizda muhim siyosiy voqea turibdi. Shu yil 24 oktyabr kuni mamlakatimizda O‘zbekiston Respublikasi Prezidenti saylovi bo‘lib o‘tadi.
So‘nggi besh yil mobaynida mamlakatimiz milliy saylov qonunchiligida jiddiy o‘zgarishlar yuz berdi. Nufuzli xalqaro ekspertlar taʼkidlaganidek, yangi O‘zbekistonda saylov qonunchiligini izchil takomillashtirish hamda saylovlarni o‘tkazish amaliyoti sifat jihatidan yangi pog‘onaga ko‘tarildi. Saylovda dunyoning 50 ga yaqin mamlakati hamda o‘nlab xalqaro tashkilotlardan kuzatuvchilar ishtirok etishi kutilmoqda”, - deb qayd etgan Davlatimiz rahbari.
Saylovlarda mamlakatda ro‘yxatga olingan beshta partiyadan besh nomzod: Ekologik partiyadan – Narzullo Oblomurodov, “Adolat” partiyasidan – Bahrom Abduhalimov, «Milliy tiklanish» partiyasidan – Alisher Qodirov, Xalq demokratik partiyasidan – Maqsuda Varisova, O‘zLiDeP partiyasidan – Shavkat Mirziyoyev ishtirok etadi.
Ayni paytda O‘zbekiston Respublikasi Prezidenti sayloviga tayyorgarlik ko‘rish bo‘yicha asosiy tadbirlar dasturiga muvofiq 814 nafar OAV vakillari akkreditatsiyadan o‘tkazilgan bo‘lib ularning 766 nafari mahalliy va 48 nafari xorijiy OAV vakillari hisoblanadi.
Eslatib o‘tamiz, avvalroq 2021 yil 24 oktyabr sanasida O‘zbekiston Prezidenti saylovi bo‘lib o‘tishi haqida xabar berilgan edi.
