“Sud o‘g‘limni qamab yuboryapti, aybsiz edi. O‘zimni yoqib yuboraman”

 

 

Aniqlanishicha, bloger Sh.Yu. jinoyat ishlari bo‘yicha Namangan tuman sudi ish yurituvidagi Jinoyat kodeksining 109-moddasi 2-qismi (qasddan badanga yengil shikast yetkazish) va boshqa moddalari bilan ayblanayotgan K.T.ga oid jinoyat ishi bo‘yicha yengilroq jazo tayinlanishiga erishish maqsadida sudya qabuliga kiradi. Sudyaga hali mazmunan ko‘rib chiqilmagan (?!) ish bo‘yicha intervyu berish talabini qo‘yadi. Bunga javoban sudya qachon va qay tartibda intervyu berishiga oid qonun normalarini tushuntirib, yozma murojaat etishini so‘raganda bloger hech qanday izohsiz, chiqib ketadi.

 

So‘ng Sh.Yu. sudlanuvchining onasi bilan telefon orqali bog‘lanib, go‘yoki, sudyani “duxi”ga o‘tqazgani, o‘g‘lini jarima jazosi bilan sud zalidan olib chiqib ketishi mumkinligini, buning uchun birgalikda ikkita videorolik tayyorlash kerakligini aytadi. Videorolikning biri “sudyaga rahmat, adolatli ekan”, ikkinchisi “sud o‘g‘limni qamab yuboryapti, aybsiz edi, o‘zimni yoqib yuboraman” mazmunida bo‘lishi kerakligi, agar sudya jarima jazo tayinlashga rozi bo‘lmasa, ikkinchi videorolikni internet tarmog‘ida tarqatib yuborishini bildiradi.

 

Buning evaziga sudlanuvchining onasidan 500 AQSH dollari talab qiladi.

 

 Olib borilgan tergovga qadar tekshirish natijasida Sh.Yu.ga nisbatan  tuhmat (JK 139-modda) va firibgarlikka (JK 168-modda) qasd qilish, shuningdek, sud ishlariga aralashish, yaʼni adolatsiz hukm chiqarilishiga erishish maqsadida sudyaga turli shaklda qonunga xilof ravishda taʼsir o‘tkazish (JK 236-modda) alomatlari bilan jinoyat ishi qo‘zg‘atildi.

 

Hozirda tergov harakatlari olib borilmoqda.

 

Eslatib o‘tamiz, avvalroq olti nafar sudya vakolat muddati davriga qayta tayinlangani hamda sudyalik lavozimlariga qayta tayinlovlar amalga oishrilgani haqida xabar berilgandi.

 

 

Bahriniso Madumarova