Abdulaziz Komilov Saudiya Arabistoni Qirolligining Favqulodda va muxtor elchisini qabul qildi
Bugun, 21 sentyabr kuni O‘zbekiston Respublikasi Tashqi ishlar vaziri Abdulaziz Kоmilov Saudiya Arabistoni Qirolligining Favqulodda va muxtor elchisi Hisham as-Suvaylimni mamlakatimizdagi diplomatik missiyasi yakunlanayotgani munosabati bilan qabul qildi.
Tashqi ishlar vazirligi matbuot xizmatining xabar qilishicha, tomonlar siyosiy, savdo-iqtisodiy, investitsiyaviy, madaniy-gumanitar va boshqa sohalardagi ikki tomonlama munosabatlarning bugungi holati va istiqbollari yuzasidan fikr almashdi.
Taʼkidlanishicha, uchrashuv davomida elchining 2017-2021 yillardagi samarali faoliyati, ushbu davr mobaynida O‘zbekiston va Saudiya Arabistoni o‘rtasidagi hamkorlik izchil rivojlanib, mustahkamlanib bordi.
"Elchi, o‘z navbatida, O‘zbekistondagi diplomatik faoliyatinig amaliy qo‘llab-quvvatlagani uchun O‘zbekiston tomoniga minnatdorlik bildirdi", deyiladi xabarda.
Eslatib o‘tamiz, avvalroq O‘zbekiston-Filippin munosabatlarining hozirgi holati va rivojlanish istiqbollari muhokama qilingani haqda xabar berilgandi.
