Yevropa Ittifoqi Gruziyani Saakashvili masalasida bosiqlikka chaqirdi
Yevropa Ittifoqi Mixail Saakashvilini qamoqqa olinishi sababli Gruziya hukumatini vazminlikka chaqirmoqda. Bu haqda Ittifoq tashqi siyosiy xizmati rasmiy vakili Nabilya Massrali maʼlum qildi.
“Gruziya sobiq prezidenti Mixail Saakashvilining vataniga qaytishi va shundan keyin qamoqqa olinishi tufayli Yevropa Ittifoqi gruzin hukumati va muxolifatini vazminlikka va qonunlarga rioya qilishga chaqiradi. Fundamental huquqlarni hurmat qilish va zarur huquqiy jarayonlarga amal qilish o‘ta muhim”, – degan Massrali.
YI rasmiy vakili barcha tomonlar mavjud nizoning keskinlashmasligida teng javobgar ekanini taʼkidladi.
Maʼlumot o‘rnida: Saakashvili 1-oktabr kuni qamoqqa olingan. U Gruziyaga 8 yillik tanaffusdan so‘ng qaytib keldi. Sobiq prezident 2004-2013 yillarda mamlakatni boshqargan. Shundan keyin u Ukraina fuqaroligini qabul qilgan va bir qancha lavozimlarda ishlagan.
Bundan avval Saakashvili ochlik eʼlon qilgani hamda Gruziyaga nima uchun qaytgani xabar qilingandi.
Jahongir Qo'ziyev
